ممبئی : ممبئی دادر کبوتر خانہ بند کئے جانے کے بعد تنازع اور کشیدگی بر قرار ہے۔ مراٹھی مظاہرین نے دادر کبوتر خانہ بند کئے جانے کے ہائیکورٹ کے فیصلہ کو درست قرار دیتے ہوئے احتجاج کیا, جس کے بعد پولیس نے مظاہرین کو زیر حراست لیا۔ مراٹھی کمیٹی نے کہا کہ ہائیکورٹ کے حکم کے مطابق دادر میں کبوتر خانہ بند کر دیا گیا ہے, اس کے خلاف گزشتہ ہفتہ وہاں جین برادری نے احتجاجی مظاہرہ کیا اور مظاہرین نے کبوتر خانہ میں داخل ہوکر ترپالیں پھاڑ دی اس سب کی مخالفت کیلئے مراٹھی ایککرن سمیتی نے دادر میں مظاہرہ کیا۔ مظاہرین نے کہا کہ صحافی بائٹ مانگنے آئے تھے ہم نے بائٹ دیا, اگر اس کے خلاف کارروائی ہورہی ہے تو یہ ہمارا سوال ہے کہ بہت سے احتجاج ہوئے ہیں ہتھیار اٹھانے کی بات کہی گئی, آپ نے اس پر کیا کارروائی کی؟ آج مراٹھیوں کو متحد ہونے کی ضرورت ہے۔ مراٹھیوں کی آواز دبانے کی کوشش کی جارہی ہے۔ سمیتی کارکن نے کہا کہ یہ کوئی مذہبی مسئلہ نہیں ہے ہم ایک ہی بات کہہ رہے ہیں یہ سماجی مفاد کا سوال ہے, اگر آپ فرقہ پرستی پیدا کرنے کی کوشش کر رہے ہیں۔ اگر آپ ہتھیار اٹھانے کی بات کر رہے ہیں تو ہمیں بتائے کہ آپ کس پر ہتھیار کا استعمال کریں گے۔ چھترپتی شیواجی مہاراج کی تلوار شمشیر اٹھانے کی روایت رہی ہے۔ ہر سماج اپنی طاقت کا مظاہرہ کر رہا ہے, جب ہماری مراٹھی ایککرن سمیتی نے میرا روڈ بھائندر میں احتجاج کی کوشش کی اس وقت نوٹس دیا گیا, مارچ کی اجازت دینے سے انکار کر دیا گیا۔ انہوں نے کہا کہ دادر میں پر تشدد احتجاجی مظاہرہ جین سماج نے کیا ان پر کوئی کارروائی نہیں کی گئی اگر یہی احتجاج مراٹھا ریزرویشن دھنگر ریزرویشن، کسانوں کی فلاح کیلئے کیا جاتا تو کارروائی کی جاتی۔ دوسری طرف مراٹھی سماج نے کہا ہے کہ آج بھی دادر میں کبوتروں کو دانا ڈالا جارہا ہے اور کبوتر خانہ بند نہیں ہے اس لئے کبوتر خانہ بند کیا جائے۔

ممبئی : جلگاؤں کے جامنیر میں اس وقت کشیدگی پھیل گئی جب ایک مسلم نوجوان کو شرپسندوں نے صرف اس لئے تشدد کا نشانہ بنایا کیونکہ وہ ایک غیر مسلم دوشیزہ کے ساتھ سائبر کیفے میں تھا اور اس کی خبر شرپسندوں کو ہوئی اور لو جہاد کے شبہ میں نوجوان سلیمان کو سائبر کیفے کے باہر پہلے زدوکوب کیا اور پھر اسے 25 کلو میٹر دور گاؤں میں لے جاکر ہجومی تشدد کا نشانہ بنایا, اس کے کپڑے پھاڑ دئیے برہنہ کر کے اسے نیم مردہ حالت میں پھینک دیا۔ جب اسے اسپتال لیجایا گیا تو ڈاکٹروں نے اسے مردہ قرار دیا۔ ہندو و مسلمان کے نام پر تشدد اور ہجومی تشدد پر فوری طور پر پابندی عائد کی جائے اور خاطیوں کے خلاف سخت کارروائی ہو۔ یہ مطالبہ آج یہاں سماجوادی پارٹی لیڈر و رکن اسمبلی ابوعاصم اعظمی نے مہاراشٹر کے وزیر اعلی دیویندر فڑنویس سے کیا ہے۔ انہوں نے کہا ہے کہ مسلمانوں کو روزانہ تشدد کا نشانہ بنایا جارہا ہے, ہجومی تشدد کی وارداتوں میں اضافہ ہوا ہے, اتنا ہی نہیں اگر کوئی غریب مسلم نوجوان کسی غیر مسلم دوشیزہ سے بات کرتا ہے یا اس کا معاشقہ ہے تو اسے تشدد کا نشانہ بنا کر موت کے گھاٹ اتار دیا جاتا ہے۔ یہ سراسر غلط ہے ہر ایک بالغ شہری کو اپنے پسند کی شادی کا حق دستور نے دیا ہے, لیکن یہ فرقہ پرست صرف غریبوں پر اس قسم کی زور آزمائی کرتے ہیں, اگر امیر کسی غیر مسلم سے شادی کرے تو سب معاف ہے۔ انہوں نے کہا کہ آج حالات انتہائی خراب اور بد سے بدتر ہوچکے ہیں, اس پر قابو پانے کی ضرورت ہے۔ ریاستی وزیر اعلی دیویندر فڑنویس سے ہمارا مطالبہ ہے کہ خدارا اسے روک کر نظم ونسق برقراری کی سعی کرے۔ انہوں نے کہا کہ مسلم نوجوان کو تشدد کا نشانہ بنانے والوں پر سخت کارروائی ہو اور اسے انصاف ملے ساتھ ہی اس قسم کی وارداتوں میں ملوث افراد کو عبرت ناک سزا دی جائے۔ ابوعاصم اعظمی نے کہا کہ آج مسلمانوں پر عرصہ حیات تنگ کر دی گئی ہے, اگر مسلمان اتنے ہی ناپسند ہے تو انہیں پھینک دیجئے یا جیل میں بند کروا دیجئے ریاست میں جس طرح سے حالات خراب ہیں وہ انتہائی تشویشناک ہے۔

ممبئی پولیس نے اسلحہ جات فروخت کرنے والے ایک گروہ کو بے نقاب کرتے ہوئے ایک اسلحہ بردار کو گرفتار کرنے کا دعوی کیا ہے تفصیلات کے مطابق انٹاپ ہل پولیس کو اطلاع ملی تھی کہ ایک شخص اسلرحہ فروخت کرنے کیلئے آنے والا ہے۔ اس پر پولیس نے چھاپہ مار کر مشتبہ شخص کی تلاشی لینے کے ساتھ گھر پر بھی تلاشی لی اور ہتھیار برآمد کیا۔ اس کے قبضے سے پولیس نے دو غیر قانونی آتشیں اسلحہ 49 کارآمد کارتوس اور 18 بئیر کارٹیج برآمد کیا گیا ہے۔ اس معاملہ میں پولیس نے جس شخص کو گرفتار کیا ہے اس کی شناخت سربجیت سنگھ کولجیت سنگھ باجوا 52 سالہ کے طور پر ہوئی ہے۔ اس کو گرفتار کر کے اس کے خلاف آرمس ایکٹ کے تحت کیس درج کر لیا گیا ہے۔ یہ کارروائی ممبئی پولیس کمشنر کی ایما پر ڈی سی پی نے انجام دی ہے۔