نئی دہلی : اس سال وجے دشمی کے موقع پر راشٹریہ سویم سیوک سنگھ (آر ایس ایس) کو 100 سال ہونے جا رہے ہیں۔ آر ایس ایس اس صد سالہ تقریب کے لیے بڑی تیاریاں کر رہی ہے۔ اس موقع پر کئی ممالک کے سفارت کاروں کو بھی مدعو کرنے جا رہا ہے اور اس کے لیے سفارت خانوں اور ہائی کمیشنز سے بھی رابطہ کیا جا رہا ہے۔ لیکن، پاکستان، ترکی اور بنگلہ دیش جیسے ممالک آر ایس ایس کے مہمانوں کی فہرست سے غائب ہیں۔ تاہم سنگھ کے اس پروگرام کے مدعو افراد کی فہرست میں اقلیتی برادریوں کے نمائندے، کھیل اور ثقافتی دنیا کی مشہور شخصیات، اسٹارٹ اپ اور تعلیم اور روحانی دنیا سے تعلق رکھنے والے رہنما اور کاروباری شخصیات بھی شامل ہوں گی۔

آر ایس ایس کی صد سالہ تقریبات سے متعلق پروگرام اسی ماہ 26 اگست سے شروع ہو رہے ہیں، جس کے تحت دہلی میں تین روزہ ڈائیلاگ کا انعقاد کیا جا رہا ہے، جس کی قیادت سرسنگھ چالک موہن بھاگوت کریں گے۔ اس ڈائیلاگ پروگرام میں آر ایس ایس کے 100 سالہ طویل سفر، قوم کی تعمیر میں اس کے کردار اور ‘نئے افق’ پر اس کے وژن پر بات کی جائے گی۔ وجے دشمی اس سال 2 اکتوبر کو ہے اور صد سالہ تقریبات اس کے بعد بھی جاری رہیں گی اور اس طرح کے چار بڑے پروگراموں کا ایک سلسلہ منعقد کیا جائے گا۔ مثال کے طور پر، نومبر میں، اسی طرح کا ایک بہت بڑا ڈائیلاگ پروگرام بنگلورو میں منعقد ہوگا، پھر کلکتہ اور ممبئی باری باری ہوں گے۔ ہر ڈائیلاگ پروگرام میں بھاگوت پہلے دو دن خطاب کریں گے اور تیسرے دن سوال و جواب کے لیے رکھا جائے گا۔

دہلی میں منعقد ہونے والا یہ پروگرام ہر روز شام 5.30 بجے شروع ہوگا اور اس میں صد سالہ سال کے لیے ‘پنچ پریورتن’ کے ایجنڈے پر تبادلہ خیال کیا جائے گا۔ بھاگوت ممکنہ طور پر مقامی طاقتوں کے ذریعے ہندوستان کے مستقبل کی تشکیل، مختلف شعبوں میں اس کی صلاحیتوں اور ملک کے ابھرتے ہوئے عالمی کردار جیسے مسائل پر بات کریں گے۔ آر ایس ایس پرچار پرمکھ سنیل امبیکر کے مطابق مدعو کرنے والوں کی فہرست تقریباً 17 اہم زمروں اور 138 ذیلی زمروں میں ہوگی۔ اس میں سماجی، معاشی، مذہبی، روحانی، کھیل، فن، میڈیا اور دانشور رہنما شامل ہوں گے۔ انہوں نے کہا، ‘ہمارا مقصد یہ ہے کہ پورا ملک اپنی ترقی کے سفر میں متحد ہو کر آگے بڑھے۔ ہم سماج کے تمام طبقات کے ساتھ بات چیت کرنا چاہتے ہیں۔’ امبیکر نے بتایا کہ کچھ غیر ملکی مشنوں سے رابطہ کرنے کا عمل جاری ہے، کچھ ممالک کو اس سے باہر رکھا جائے گا۔ ان کا کہنا تھا کہ ‘ہم کئی ممالک سے رابطے میں ہیں، لیکن موجودہ حالات میں پاکستان کو مدعو نہیں کیا جائے گا۔’ آر ایس ایس ذرائع کے مطابق بنگلہ دیش اور ترکی جیسے ممالک کو بھی مدعو نہیں کیا جا رہا ہے۔

ممبئی : ممبئی دادر میں کبوتر خانوں کو بند کئے جانے کیخلاف صبح جین سماج نے احتجاجی مظاہرہ کیا اور احتجاج کے دوران جین سماج مشتعل ہوگیا اور کبوتر خانہ پر لگائے گئے ترپالیں اور بامبو ہٹانا شروع کردیا۔ اس دوران پولیس نے مداخلت کی تو پولیس اور مظاہرین میں دھکا مکی ہوگئی۔ جین سماج کی روایت ہے کہ وہ صبح پرندوں کو دانہ ڈالتے ہیں, ایسے میں بی ایم سی نے ہائیکورٹ کے حکم کے بعد کبوتر خانوں کو بند کر دیا ہے۔ ممبئی شہر میں تمام کبوتر خانوں میں دانا ڈالنے پر پابندی عائد کر دی گئی ہے۔ جین سماج میں اس سے ناراضگی پائی گئی ہے۔ گزشتہ روز وزیر اعلی دیویندر فڑنویس نے ایک اہم میٹنگ طلب کی تھی, جس میں یہ فیصلہ لیا گیا تھا کہ کبوتروں کے فضلات سے ہونے والی بیماریوں کے سدباب کیلئے اس کے فضلات بٹ کو فوری طور پر صاف کرنے کا نظم کیا جائے گا, اتنا ہی نہیں دانا ڈالنے کا وقت بھی مقرر ہوگا۔ اسی دوران آج جین سماج نے احتجاجی مظاہرہ کیا اس میں خواتین بھی شامل تھی۔ خواتین نے یہاں ترپالیں ہٹانے کے ساتھ تمام بامبو نکال دئیے اور ایک مرتبہ پھر دادر کبوترخانہ کو کبوتروں کی رہائش گاہ کیلئے کھول دیا گیا۔

دادرمیں کبوتروں کی فضلات سے بیماری کی شکایت کے بعد بی ایم سی اور ہائیکورٹ نے کبوتر خانوں کو بند کرنے کا فرمان جاری کیا تھا اور کبوتر کو دانا ڈالنے پر جرمانہ اور کیس درج کرنے کا سلسلہ شروع کر دیا تھا۔ ماہم میں کبوتر کو دانا ڈالنے پر ممبئی پولیس نے پہلا کیس درج کیا ہے۔ اسی کے ساتھ اب دادر میں کبوتر خانہ پر سے ترپالیں نکالنے کے بعد حالات کشیدہ ضرور ہے, لیکن امن وامان برقرار ہے۔ دادر میں پولیس کے اضافی بندوبست کو تعینات کیا گیا ہے۔ ممبئی میں جس طرح سے کبوتر خانہ کو بند کیا گیا ہے اس پر جین سماج مضطرب ہے اور اس نے اس کے خلاف احتجاج شروع کردیا ہے۔

جین سماج کا کہنا ہے کہ شراب گٹکا اور نشے پر پابندی عائد کی جائے۔ شراب بندی ہو لیکن کبوتروں کے دانا ڈالنے کو ہی سرکار نے جرم قرار دیا ہے یہ سراسر غلط ہے۔ انہوں نے کہا کہ شراب اور گٹکا کھانے سے بھی بیماری نہیں ہوتی ہے؟ اس کے باوجود اس سے سرکار کو ٹیکس ملتا ہے, اس لئے ہم بھی سرکار کو ٹیکس دینے کو تیار ہے۔ انہوں نے کہا کہ کبوتروں کو دانا ڈالنا اور جانوروں چرند پرند کی خدمت کرنا یہ ایک تہذیبی ورثہ ہے, ایسے میں کوئی بھی اس قسم کی پابندی عائد نہیں کر سکتا اس کی ہم مخالفت کرتے ہیں۔ دادر میں کبوتر خانہ بند کرنے کے بعد دوبارہ جین سماج نے اسے کھول دیا ہے۔ پولیس نے بتایا کہ احتجاجی مظاہرہ کے بعد حالات قابو میں ہے لیکن کشیدگی ہنوز برقرار ہے۔

ممبئی : مہاراشٹر کے وزیر منگل پربھات لوڈھا نے دادر کبوتر خانہ کو احتجاج کے بعد اب جین سماج سے اپیل کی ہے کہ وہ امن وامان برقرار رکھیں, انہوں نے کہا کہ سرکار نے کبوتر خانہ سے متعلق فیصلہ لیا تھا اور گزشتہ روز وزیر اعلی دیویندر فڑنویس نے اس متعلق اہم فیصلہ لیا تھا, لیکن اس کے باوجود یہ احتجاجی مظاہرہ افسوسناک ہے۔ انہوں نے کہا کہ سرکار نے کبوتر خانہ سے متعلق میٹنگ میں فیصلہ لیا گیا ہے۔ اس سے ہونے والی بیماری پر بھی تبادلہ خیال کیا گیا اور اس کے سد باب کیلئے وزیر اعلی نے اہم فیصلہ لیا تھا کبوتروں کو دانا ڈالنے سے متعلق احتیاط اور شرائط پر بھی غور کیا گیا تھا اور وزیر اعلی نے اس متعلق کاروائی نہ کرنے کا بھی حکم دیا تھا, لیکن اس کے باوجود آج اچانک یہ احتجاجی مظاہرہ درست نہیں تھا۔ منگل پربھات لوڈھا نے اس متعلق جین سماج سے امن وامان کی اپیل کی ہے۔ پولیس نے بتایا کہ احتجاجی مظاہرہ کے بعد حالات پرامن ہے, لیکن کشیدگی برقرار ہے پولیس نے اب اس معاملہ میں قانون چارہ جوئی کر نے کے ساتھ ایف آئی آر درج کرنے کا سلسلہ شروع کردیا ہے۔