تعلیم کی اہمیت پر زور دیتے ہوئے رکن پارلیمنٹ اور حج کمیٹی آف انڈیا کے سابق چیرمین محبوب علی قیصر نے کہاکہ پوری دنیا کا جائزہ لیں تو آپ پائیں گے کہ جس قوم نے تعلیم کے میدان میں نمایاں کارکردگی کا مظاہرہ کیا۔ وہی قوم ترقی یافتہ کہلائی۔ یہ بات انہوں نے شاہین باغ میں عائشہ ایجوٹیک پرائیویٹ لمیٹیڈ کے تعاون سے رحمان 30 کی شاخ کے افتتاح موقع پر اپنے تاثرات کا اظہار کرتے ہوئے کہی۔ انہوں نے کہا کہ ہمارے مذہب میں تعلیم کی کتنی اہمیت ہے، اس کا اندازہ پہلی نازل ہونے والی وحی اقراء سے لگایا جاسکتا ہے۔ اسلام میں سب سے زیادہ زور تعلیم پر دیا ہے۔ یہی وجہ ہے کہ وہ عرب قوم جو ایک معمولی سی بات پر برسوں لڑتی رہتی تھی۔ اسلام کی آمد کے بعد مہذب بن گئی۔ اور تعلیم کے میدان میں نمایاں کردار ادا کیا۔ جس سے ایک بڑے خطے پر وہ حکمراں بن گئی، اور انہوں نے سائنس، جغرافیہ، الجبرا اور دیگر تعلیمی میدان میں اپنے جھنڈے گاڑے۔ جسے انگریزوں نے حاصل کیا، اور وہ دنیا میں ترقی یافتہ قوم ہے، اور تمام شعبوں پر ان کا دبدبہ ہے۔

انہوں نے کہا کہ ہندوستان کی تہذیب پانچ ہزار سال پرانی ہے، یہاں موہن جوداڑو، ہڑپا تہذیبیں تھیں، ٹکسلا، نالندہ یونیورسٹی تھی۔ انہوں نے کہا کہ جس ملک کے بچے پڑھیں گے وہی ملک ترقی یافتہ ہوگا۔ انہوں نے ملک کے نوجوانوں کو ہندوستان کی طاقت قرار دیتے ہوئے کہا کہ ان کی تعلیم کے لئے حکومت کو نجی اداروں کی شراکت سے زیادہ کوشش کرنے کی ضرورت ہے۔

سپرتھرٹی کے سربراہ آنند کمار نے کہا کہ ہم نے رحمان تھرٹی کے تعاون ایسے بچوں کو ڈاکٹر اور انجینئر بنایا ہے، جو مالی طور پر انتہائی کمزور تھے۔ انہوں نے تعلیم کے حوالے سے کہا کہ با صلاحیت اور ذہین بچوں کی مالی مدد کی ضرورت ہے، جو اپنا خرچ برداشت نہیں کرسکتے۔ انہوں نے کہا کہ جس طرح شاہین باغ کا نام پوری دنیا میں ہے، اب شاہین باغ رحمان تھرٹی کی وجہ سے بھی جانا جائے گا۔ اور اب رحمان تھرٹی کے طلبہ پوری دنیا میں شاہین باغ کا نام روشن کریں گے۔ انہوں نے کہا کہ یہاں کے بچوں میں صلاحیت کی کمی نہیں ہے، بلکہ انہیں مواقع اور مدد کی ضرورت ہے۔

رحمان تھرٹی کے بانی اور سربراہ عبیدالرحمان نے کہاکہ رحمان تھرٹی کا مقصد اچھی تعلیم دینے کے ساتھ اچھا انسان بھی پیدا کرنا ہے۔ انہوں نے کہا کہ جب تک ہمارے معاشرے میں ڈاکٹرس، انجینئرس اور دیگر شعبوں کے ماہرین نہیں ہوں گے۔ اس وقت ہمارا معاشرہ ترقی یافتہ نہیں بن سکتا۔ انہوں نے کہاکہ ہمارا مقصد ان بچوں تک پہنچنا ہے جو صلاحیت مند ہیں، ذہین ہیں لیکن وہ تعلیم حاصل کرنے کی استطاعت نہیں رکھتے۔ انہوں نے کہا کہ بچوں کو ٹسٹ کے ذریعہ ہم لیتے ہیں، اور ان کا خرچہ برداشت کرتے ہیں تاکہ ڈاکٹرس، انجینئرس بن کر ملک اور قوم کی خدمت کرسکیں۔

اس موقع پر علیگڑھ مسلم یونیورسٹی کے سابق پرو وائس چانسلر بریگڈیر سید احمد علی نے دہلی میں رحمان تھرٹی شروع کرنے کے لئے مبارکباد پیش کرتے ہوئے کہا کہ تعلیم سے ہی قوم کی تقدیر اور تصویر بدلے گی۔

عائشہ ایجوٹیک کے منیجنگ ڈائرکٹر محمد احتشام الحق نے تمام مہمانان اور شرکاء کا شکریہ ادا کرتے ہوئے کہا کہ ہمارا نصب العین تعلیم کو فروغ دینا ہے، اور اس ادارے سے پڑھنے والے ڈاکٹرس اور انجینئرس بن کر نکلیں گے، اور شاہین باغ کا نام روشن کرنے کے ساتھ ملک کے وقار کو بھی بلند کریں گے۔