ممبئی : مہاراشٹر کے انسداد دہشت گردی اسکواڈ (اے ٹی ایس) نے بدھ کو پاکستانی گینگسٹر شہزاد بھٹی اور ڈوگرہ گینگ کے نیٹ ورک کے خلاف ایک بڑا کریک ڈاؤن شروع کیا۔ اس آپریشن کا مقصد ان افراد کو نشانہ بنانا ہے جو پاکستان میں موجود گینگسٹر نیٹ ورکس بشمول شہزاد بھٹی گینگ اور ڈوگرہ گینگ سے وابستہ ہیں یا ان سے روابط رکھتے ہیں۔ حکام کے مطابق، مربوط چھاپے بدھ کی صبح آٹھ بجے مہاراشٹر کے کئی مقامات پر شروع ہوئے اور رات گئے تک جاری رہے۔ چھاپے کے دوران اے ٹی ایس نے 57 لوگوں سے پوچھ گچھ کی، جن میں ممبئی کے 17، چھترپتی سمبھاجی نگر کے 14 اور پونے اور ناسک سے آٹھ-آٹھ افراد شامل ہیں۔ اے ٹی ایس نے نالاسوپارہ، میرا روڈ، ناگپور، پونے، ممبئی، اکولا، ناندیڑ، ناسک اور جلگاؤں میں چھاپے مارے۔ یہ آپریشن ایک بڑے آپریشن کا حصہ ہے جس کا مقصد ریاست کے اندر کام کرنے والے مبینہ گینگسٹر سے متعلق نیٹ ورکس کو ختم کرنا ہے اور ایسے افراد کی شناخت کرنا ہے جن کے ان گینگز کے ساتھ براہ راست یا بالواسطہ تعلق ہونے کا شبہ ہے۔

عہدیداروں نے کہا کہ اے ٹی ایس ان لوگوں سے پوچھ گچھ کرنے کا ارادہ رکھتی ہے جو مبینہ طور پر ان بدمعاشوں سے جڑے ہوئے ہیں، بشمول وہ لوگ جو سوشل میڈیا پلیٹ فارم کے ذریعہ ان کے ساتھ رابطے میں ہیں یا جن کے بارے میں خیال کیا جاتا ہے کہ وہ ان نیٹ ورکس کے پیروکار یا حامی ہیں۔ تفتیشی ایجنسیوں کے مطابق، وقتاً فوقتاً موصول ہونے والی انٹیلی جنس معلومات سے یہ اشارہ ملتا ہے کہ سرحد پار سے سرگرم گینگسٹر مبینہ طور پر مہاراشٹر کے نوجوانوں کو متاثر کرنے اور اپنے مجرمانہ نیٹ ورکس میں بھرتی کرنے کے لیے سوشل میڈیا کا استعمال کر رہے ہیں۔

حکام نے دعویٰ کیا کہ ان گروہوں نے مبینہ طور پر مقامی نوجوانوں کو پرتعیش طرز زندگی اور مالی فوائد کے وعدے کے ساتھ لالچ دیا۔ ایسا کرکے وہ ریاست کے مختلف حصوں میں اپنا اثر و رسوخ بڑھانا چاہتے تھے۔ حکام نے کہا کہ اے ٹی ایس کا آپریشن بنیادی طور پر ‘سلیپر سیلز’، مقامی آپریٹو، اور ان گینگز سے وابستہ ممکنہ سپورٹ سسٹم کی شناخت پر مرکوز ہے۔ اس کا مقصد اس بات کو یقینی بنانا ہے کہ اسلحے کی اسمگلنگ یا کسی بڑی سازش کو شکل اختیار کرنے سے پہلے ہی روکا جائے۔ اے ٹی ایس کی کئی ٹیمیں فی الحال اس بڑے پیمانے پر تلاشی اور تصدیقی آپریشن میں مصروف ہیں، جو کہ ایک ساتھ مختلف شہروں اور اضلاع میں چلائی جا رہی ہے۔

چھاپوں کے دوران، اے ٹی ایس کے اہلکاروں نے جاری تفتیش کے حصے کے طور پر مشتبہ افراد سے منسلک مقامات سے لیپ ٹاپ، موبائل فون، پین ڈرائیوز اور دیگر الیکٹرانک آلات ضبط کر لیے۔ تفتیش کار مشتبہ افراد کے بینک اکاؤنٹس اور مالیاتی لین دین کا بھی باریک بینی سے جائزہ لے رہے ہیں۔ اس کا مقصد یہ طے کرنا ہے کہ آیا کوئی فنڈز مبینہ طور پر پاکستان یا دیگر غیر ملکی مقامات سے غیر قانونی ‘حوالہ’ چینلز کے ذریعے بھیجے جا رہے ہیں۔ حکام نے بتایا کہ تلاشی کے دوران برآمد ہونے والے ڈیجیٹل شواہد کا تجزیہ کیا جا رہا ہے۔ اس کا مقصد مبینہ نیٹ ورک کی حد کا تعین کرنا اور اضافی افراد کی نشاندہی کرنا ہے جو ان گینگسٹرز یا ان سے منسلک دیگر ماڈیولز کے ساتھ رابطے میں ہو سکتے ہیں۔

ممبئی : ممبئی مہاراشٹر انسداد دہشت گردی اے ٹی ایس نے ریاست بھر میں ٩ اضلاع میں چھاپہ مار کاروائی کے دوران ۵۷ افراد کو زیرحراست لیا ہے, ان پر پاکستانی گینگسٹر شہزاد بھٹی سے تعلقات کا الزام ہے۔ ان افراد سے اے ٹی ایس کی مسلسل پوچھ گچھ جاری ہے اے ٹی ایس آج صبح ۸ بجے سے چھاپہ مار کریک ڈاؤن شروع کیا تھا۔ چھاپہ مار کارروائی کے دوران اے ٹی ایس نے مشتبہ افراد سے پوچھ گچھ کے ساتھ ان کے الیکٹرک گزٹ سمیت دیگر دستاویزات بھی ضبط کئے ہیں۔ اے ٹی ایس ذرائع نے بتایا کہ ان افراد کے شہزاد بھٹی سے تعلقات کے دوران کیا خفیہ اطلاع مشتبہ افراد نے فراہم کی۔ اس کے ساتھ ہی مزید کتنے افراد پاکستانی گینگسٹر کے رابطے ہیں اس کی تفتیش جاری ہے نالا سوپارہ، ناسک، بیڑ، میرا روڈ سمیت تقریبا ۹ اضلاع میں کریک ڈاؤن کیا گیا۔ اے ٹی ایس ذرائع نے بتایاکہ آن لائن بھی یہ مشتبہ افراد شہزاد بھٹی کے رابطے میں تھے اس کے ساتھ ہی شہزاد بھٹی کو یہ کیا اطلاعات فراہم کرتے تھے اس کی بھی تفتیش جاری ہے, البتہ اے ٹی ایس کی چھاپہ مار کارروائی کے دوران بیڑ میں بھی دو مشتبہ افراد کو زیر حراست لیا گیا ہے۔ اس چھاپہ مار کارروائی سے سنسنی پھیل گئی۔ علی الصبح تفتیشی اداروں نے پاکستانی گینگسٹر شہزاد بھٹی کے نیٹ ورک میں شامل ہونے کے شبہ میں کئی مقامات پر چھاپے مارے اور رابطہ کاروں کو زبردست لیا۔ بیڑ ضلع میں ددو مشتبہ افراد سے پوچھ گچھ کی گئی ہے ان کی شناخت بالو رنگناتھ پاتھاڈے، تعلقہ اشٹی، ضلع بیڑ کے ساکن اور کرن جگن ناتھ بھور، آسٹا، تعلقہ اشٹی، ضلع بیڑ ساکن کے طور پر ہوئی ہے ان دونوں سے تلاشی مہم کے دوران کوئی بھی قابل اعتراض مشمولات برآمد نہیں ہوا ہے, جبکہ اے ٹی ایس نے ان مشتبہ افراد کے قبضے سے موبائل بھی برآمد کئے ہیں اور ان سے مزید تفتیش جاری ہے۔ موبائل پر رابطہ کاروں کے کنکشن کی بھی تفتیش جاری ہے۔ اے ٹی ایس کی کارروائی کے بعد ریاست بھر میں گینگسٹر بھٹی کے نیٹ ورک کو زبردست جھٹکا لگا ہے۔

ممبئی : ڈاکیارڈ روڈ علاقہ میں ڈی اور انڈرورلڈ ڈان داؤد ابراہیم و چھوٹا شکیل کے معتمد خاص آصف داڑھی کے فرزند سمیر خان پر فائرنگ کے کیس کو ممبئی کرائم برانچ نے حل کرنے کا دعویٰ کیا ہے اور اس معاملہ میں کرائم برانچ نے ہتھیار سمیت موبائل اور موٹر سائیکل برآمد کرنے میں کامیابی حاصل کرلی ہے۔ پیسوں کے لین دین اور تنازع کے سبب ملزمین نے آصف داڑھی کے فرزند سمیر خان کو نشانہ بنا کر اس پر قاتلانہ حملہ کیا تھا اس کے بعد پولس نے جائے وقوع پہنچ پر فارنسک جانچ سمیت دیگر تفتیش کی اور ممبئی کرائم برانچ کے اس معاملہ میں متوازی تفتیش شروع کی اور ملزمین حملہ آوروں کا سراغ ٹیکنیکل بنیاد پر کرائم برانچ کو ملا۔ جس کے بعد ممبئی کے مضافات ماہم درگاہ کے قریب سے دونوں شوٹروں کو کرائم برانچ یونٹ تین نے نصف شب میں گرفتار کرلیا۔ ممبئی پولس کمشنر دیوین بھارتی کی ایما پر جوائنٹ پولس کمشنر لکمی گوتم اور ڈی سی پی راج تلک روشن نے یہ کارروائی انجام دیا ہے۔ ملزمین نے ابتدائی تفتیش میں اعتراف جرم کر لیا ہے اور بتایا ہے کہ پیسوں کے تنازع میں فائرنگ کی واردات انجام دی گئی۔ فائرنگ کے بعد بائیکلہ پولس میں آرمس ایکٹ سمیت قاتلانہ حملہ کے معاملہ میں کیس درج کیا گیا تھا۔ اس معاملہ میں ممبئی کرائم برانچ پر زاویے سے جانچ کر رہی ہے, جن دو ملزمین کو گرفتار کیا گیا ہے, ان کی شناخت صادق شیخ لیاقت شیخ ۳۰ سالہ، ذیشان انور شیخ ۳۰ سالہ کے طور پر ہوئی ہے آصف داڑھی کا انڈرورلڈ کنکشن ہے, اس لئے اس زاویہ پر بھی کرائم برانچ جانچ کر رہی ہے۔ بتایا جاتا ہے کہ سمیر خان تعمیراتی کمپنی کا مالک بھی ہے اور اس کے کنسٹریشن کا ٹھیکہ بھی حاصل کیا ہے۔ اس معاملہ میں بھی ممبئی کرائم برانچ جانچ کر رہی ہے۔ اس فائرنگ کے بعد ممبئی میں سنسنی اور کشیدگی پھیل گئی تھی لیکن ممبئی کرائم برانچ نے چند گھنٹوں میں ہی کیس کو حل کر لیا اور ملزمین پولس گرفت میں ہے۔کرائم برانچ یہ بھی معلوم کر رہی ہے کہ اس میں مزید افراد ملوث ہے یانہیں اور سمیر پر حملہ کی سپاری کس نے دی تھی ابتدائی تفتیش میں دونوں ملزمین ہی اس معاملہ میں شامل پائے گئے ہیں۔